Évangéliser les aréopages contemporains

Accueil » Parole de Dieu (en Kirundi) » Dimanches » IDOMINIKA Y’IBISANDASANDA N’IY’UKUBABARA KW’UMUKAMA

IDOMINIKA Y’IBISANDASANDA N’IY’UKUBABARA KW’UMUKAMA

AU FIL DU TEMPS (Articles publiés)


UKWINJIRA KW’UMUKAMA I YERUZALEMU

Ivyo basoma mu mwaka «A» na «B» twaravyanditse mu bihimba vyagenewe umwaka «A» na «B» nyene. Aha tugira tuhandike ivyagenewe umwaka «C». Iyi Nkuru Nziza tugira ngo dutangurireko, murazi ko ari iyisomwa imbere y’Ukwinjira mw’isengero.

RameauxINKURU NZIZA

Ivyo dusoma mu Nkuru nziza ya Yezu Kristu nk’uko yashikirijwe na Luka (19, 28-40)

Yezu aja imbere, ararōngōra abigishwa biwe baduga i Yeruzalemu. Ngo yegere i Betifage na Betaniya, hafi y’agasozi kitwa ak’Imizeti, arungika babiri bo mu bigishwa biwe ati : « Gende mu gisagara kiri harya imbere, muza kuhasanga indogobwe y’umukurira iziritse, itarigera igenderwako ; muyiziture muyinzanire. Hakagira uwubabaza igituma muyizituye, muramwishura muti : Umukama ni we ayitumyeko ».

Abatumwe rero baragenda, basanga vyose bimeze nk’uko Yezu yabibabwiye. Mu gihe bariko barazitura nya ndogobwe, beneyo bati : « lyo ndogobwe muyiziturira iki ? » Bati : « Umukama arayikeneye. » Baraheza bazanira Yezu ino ndogobwe, maze bayisasako imitamana yabo, aca bicarikako Yezu. Ngo batangure kugenda, abantu bakaza barasasa imitamana yabo mu nzira. Bari mu gishikira akamanuko ko ku Gasozi k’Imizeti, abigishwa biwe bose batereza ijwi, baninahaza Imana n’agahimbare ku bitangaro vyose bari babonye, bavuga bati : « Haninahazwe uyo Mwami aje kw’izina ry’Umukama ! Amahoro mw’ijuru, n’ishimagizwa rirengere kure mu bicu ! » Nayo Abafarizayo bari mw’ishengero babwira Yezu bati « Ewe Muhanyi, hoza aba bigishwa bawe ! » Na we ati : « Ntimuzi ko abo bacereje, amabuye yoca ahanirana ! »

IMISA Y’UKUBABARA KW’UMUKAMA

IGISOMWA CA MBERE

Ivyo dusoma mu gitabu c’Umuhanuzi Izaya (50, 4-7)

Abancira amate mu maso sinayabahishije, ariko ndazi ko ntazoteterwa

Umukama Imana yanje yarampaye ururimi rw’umwigishwa, kugira ngo nshobore kuremesha uwaruhijwe. Uko bukeye niko ankebura, kugira ngo ndamutege ugutwi nk’uwigishwa.

Umukama yarazibuye amatwi yanje, nanje sinamwankiye, sinamuzibukiriye. Narateze ibitugu abankubita, abanshikura ubwanwa ndabatega imisaya, abankubita be n’abancira amate sinabahishije amaso.

Umukama Imana yanje arantabara, nico gituma ivyo bitutsi ataco bingira ; nico gituma mu maso nahakomeje hakadadarara nk’ibuye, ndazi ko ntazoteterwa.

IZABURI 21 (22), 8-9, 17-18a, 19-20, 23-24

Icit : Mana yanje, Mana yanje,
         wampebeshejwe n’iki ?

Abambona bose barantwenga,
Barampfunira, bakazunguza umutwe,
bati : « Hamwe yizera Imana, n’imukize !
ugasangwa ari yo mugenzi afise, nimurekure !»

ibipfizi indiri birankikiza,
ibinyamaswa amahanga vyo mw’ishamba bikanca iruhande ;
vyamboshe amaguru n’amaboko :
noshobora n’uguharura amagufa yanje yose.

Baragabangana ivyambarwa vyanje,
bagapfindanira ku mutamana wanje.
Ariko Weho, Mukama, ntunje kure,
Wewe nzeyeko amagara, tebuka untabare.

Nzoheza nirahire izina ryawe mu muvukano,
nkuyage hagati y’ishengero.
Mwebwe mwubaha Imana, nimuyihaye,
muyishemeze mwese uko mungana !

IGISOMWA CA KABIRI

Ivyo dusoma mw’Ikete Umutumwa Pawulo yandikiye Abanyafilipi (2, 6-11)

Yarigize ubusa, nico catumye Imana imushira hejuru ya vyose

Umukama Yezu, n’aho yamanye akamere k’Imana,
ntiyigeze yishira hejuru ngo n’uko angana n’Imana ;
ariko yigize ubusa mu gusangira akamere k’abasuku,
mu kwigira umuntu asa n’abandi ;
yigenjeje nk’umuntu asanzwe,
arushirizaho mbere kwicisha bugufi,
aragamburuka gushika yemere urupfu
kandi urupfu rwo ku musaraba.

Ni co catumye Imana imushira hejuru ya vyose,
ikamugabira Izina rirengeye amazina yose,
kugira ngo kw’izina rya Yezu, bose bakubite ibipfukamiro
mw’ijuru, kw’isi no mu kuzimu kw’inyenga,
kandi ururimi rwose ruyage ko Yezu Kristu ari Umukama,
ngo Imana Se ininahazwe.

INKURU NZIZA

Urakaninahazwa kandi uragashemezwa, Mukama Yezu.

Ku bwacu twese, Yezu Kristu yarigize umugamburutsi
gushika yemere urupfu, kandi urupfu rwo ku musaraba.
Ni co catumye Imana imushira hejuru ya vyose,
ikamugabira Izina rirengeye amazina yose.

Urakaninahazwa kandi uragashemezwa, Mukama Yezu.

Mu kubabara kw’Umukama kwanditswe na Matayo, barashobora kubisoma ari batatu : Umusomyi (S), Abantu (Ab) na Yezu (Y), Umusomyi agasoma inyigano, Abantu bagasoma amajambo yavuzwe n’abantu nyene, Umusaserdoti canke (Y) agasoma amajambo yavuzwe n’Umukama.

Ukubabara kw’Umukama wacu Yezu Kristu nk’uko kwashikirijwe na Luka (22, 14-23, 56)

Igisomwa kigufi : 23, 1-49

Yezu ku meza hamwe n’abatumwa biwe

S : Igihe gishitse, Yezu aja ku meza
hamwe nauaiumwa Diwe.
arababarira ati :

Y : « Naripfujije cane gusangira namwe iyi Pasika
ntarababara.
Kukaba nka ko ndabibabwiye :
sinzosubira kuyirya gushika izoba irangukiye
mu Bwami bw’Imana. »

S : Afashe igikombe,
arakenguruka, araheza avuga ati :

Y : « Ni mucakire, musabikanye.
Kukaba nka ko ndabibabariye :
sinzosubira kunywa inyobwa y’imizabibu
gushika Ubwami bw’Imana bushike. »

S : Afashe kandi umukate,
arakenguruka, arawumanyura, arawubaha,
avuga ati :

Y : « Iki ni umubiri wanje uza gutangwa ku bwanyu.
Ivyo murabigire munyibuka.

S : Bamaze gufungura, agira kwa kundi,
afata igikombe, araheza avuga ati :

Y : « lki gikombe ni isezerano rishasha
ry’amaraso yanje aza guseseka kubwanyu.
Kandi mbere ng’uku ukuboko kw’uwuza kungurisha
turiko turasangira ku nkōko imwe.
Eka ni ko, Umwana w’umuntu arigiriye
nk’uko vyashinzwe ;
ariko aragowe uyo muntu aza kumugurisha ».

S : Na bo babandanya kubazanya
ngo yoba nde muri bo uwuzobikora.
Maze havyuka muri bo umuhazuko
ngo ni nde mukuru muri bo.

Arababarira ati :
Y : « Abami b’ibihugu baravyiganzako,
n’abafise ubukuru biyita ba rutungaboro.
Mweho si uko :
ariko umukuru muri mwebwe n’abe nka mutoyi,
uwugaba na we n’abe nk’uwubakorera.
None, umukuru ni uwicaye ku meza
canke ni uwumukorera ?
Mbega, si uwicaye ?
Ariko, jeho ndi hagati yanyu nk’uwubakorera.
Mwebwe mwaragumije umutima mu makuba narimwo.
Nanje ndabashikirije Ubwami bwa Data
nk’uko yabunshikirje.
Muzofungurira ku meza yanje mu Bwami bwanje,
kandi muzovyagira ku ntebe mucire imanza
imiryango cumi n’ibiri y’Israyeli.

« Simoni, Simoni we !
Raba, Shetani yabarondeye
ngo ibagosore nk’ingano.
Jeho ariko nagusabiye
ngo ukwemera kwawe ntikugirire ;
nawe, niwahinduka, uraremesha benewanyu. »

S : Simoni aramubwira ati :
Ab : « Mukama, iyo uzoja tuzojana,
ari mw’ibohero, ari no mu rupfu nyene ! »

S : Yezu amusubiza ati :
Y : « Ndabikubariye, Petero :
uyu musi nyene, isake itarabika,
uzoba umaze kunyihakana gatatu kose ».

S : Araheza arababarira ati :
Y : « Aho nabarungika ata saho,
ata mpamba, ata nkweto,
hari ico mwigeze mubura ? »

S : Baramwishura bati
Ab : « Haba namba ».

S : Arabasubiza ati :

Y : « Ubuho rero uwufise isaho nayifate,
n’uwufise umufuko awiyegereze ;
uwutagira inkota we
agurishe umutamana wiwe, ayigure.
Ni ukuri ndabibabwiye :
ndategerezwa kurangura ivyanditswe ngo :
Yaraharuwe mu banyakabi.
Kukaba nka ko, iryamvuzweko rigira ngo ritahe. »

S : Baramubvdra bati :
Ab : « Mukama, ng’izi inkota zibiri hano. »

S : Arabishura ati :
Y : « Ziramaze ».

Yezu ku Gasozi k’Imizeti
S : Asohotse, agenda ku Gasozi k’Imizeti
nk’uko yari yaramenyereye ;
abigishwa biwe na bo baramukwirikira.
Ngo ashikeyo, arababarira ati :

Y : « Nimusabe, mwoye gutsindwa n’inyosha mbi. »

S : Araheza yigira imbere nk’aho umuntu yotera ibuye,
arapfukama asaba ati :

Y : « Dawe ! Niwaba ubishaka nkurako aya magorwa !
Ariko, ntibibe nk’uko jewe nshaka,
nibibe nk’uko wewe ubishaka ! »

S : Abonekerwa n’Umumarayika avuye mw’ijuru, aramuremesha.
Ngo ikinya gitangure kumusukira, arushirizaho gusaba ;
aja mu kubira icuya c’amaraso, kijojotera hasi.
Ngo aheze gusaba, ava hasi aja aho abigishwa biwe bari,
asanga basinzirijwe n’intuntu.

Arababarira ati :
Y : « Ko musinziriye n’iki ?
Nimuvyuke, musabe,
mwoye gutsindwa n’inyosha mbi. »

S : Akivuga, haza igitero kirongowe n’uwitwa Yuda,
umwe wo muri bamwe cumi na babiri ;
aregera Yezu ngo amuramutse mu kumusoma.
Yezu rero amubwira ati :

Y : « Aho ga Yuda, uratanga Umwana w’umuntu
mu kumusoma ! »

S : Abari bamukikije babonye ibibaye, baramubaza bati :

Ab : « Mbega, Mukama tubakubite inkota ? »

S : Umwe muri bo aca akubita umusuku w’umuherezankuka mukuru
amuca ugutwi kw’iburyo.
Yezu yamara aramubarira ati :

Y : « Sigaho ».

S : Akora ku gutwi kwiwe, aramukiza.
Araheza Yezu abarira abari bamuziye, abakuru b’abaherezankuka,
ababwiriza b’igisengero n’abakurambere, ati :

Y : « Ko mwazanye inkota n’amahiri
nk’abahiga igisuma, ni kuki ?
Aho twamaniye imisi yose mu gisengero,
ntimwankojejeko iminwe ; ariko ubu,
harageze isaha yanyu n’ububasha bw’umukorane. »

Yezu imbere y’umukuru w’abaherezankuka

S : Baramufata, baramujana,
bamwinjiza mu nzu y’umuherezankuka mukuru ;
Petero na we aramukurikira, agendera kure.
Bacanye umuriro hagati mu rugo, barawukikuza baricara,
Petero ari muri bo.
Incoreke imubonye iramwitegereza, ivuga iti :

Ab : « N’uyu yari kumwe na we ! »
S : Petero arahakana ati :
Ab : « Oya, wa mugore, sindamuzi ! »

S : Haciye akanya, uwundi aramubona, aramubwira ati :

Ab : « Nawe nyene uri umwe muri bo. »

S : Petero aramwishura ati :
Ab : « Eka yewe, sindi we ! »
S : Haciye nk’umwanya w’isaha imwe,
uwundi yongera kuvuga ashimitse, ati :

Ab : « Ni ukuri, n’urya atari kumwe na we ;
kanatsinda, n’Umunyagalile. »

S : Petero aramubwira ati :
Ab : « Ewe, wa muntu, sinumva n’ivyo uvuga ! »

S : Buno nyene akiriko aravuga, isake irabika.
Umukama na we akebutse araba Petero.
Petero na we yibuka rya jambo Umukama yavuga ati :
“Uyu musi nyene n’isake itarabika, uzoba umaze kunyihakana gatatu”.
Petero asohotse yiyuha iryosozi.

Abagabo bari bacunze Yezu baramutwenga bamukubita.
Baramupfuka mu maso, hanyuma bamubaza bati ;
Ab : « Pfindura ! Uwagukubise ni nde ? »
S : Baramutuka n’ibindi vyinshi.

Ngo buze guca,
abakurambere b’igihugu, abakuru b’abaherezankuka n’abigisha
bamujana mu ntahe yabo, baramubwira bati :

Ab : « Niwaba uri Kristu, bitubarire. »
S : Arababwira ati :

Y : « N’aho ndabibabarira ntimuvyemera ;
kandi n’aho ndababaza ntimunyishura.
Ariko kuva ubu, Umwana w’umuntu
azoba yicaye iburyo bw’ububasha bw’Imana.

S : Bose baramubaza bati :
Ab : « None rero, uri Umwana w’Imana ? »

S : Arabishura ati :
Y : « Muvuze ko, ndi We. »

S : Na bo bati :

Ab : « Turacaronderera iki ivyabona ?
Twebwe nyene turavyiyumviye mu kanwa kiwe. »

Igisomwa kigufi gitangurira aha

Yezu imbere ya Pilato

S : Abakuru b’abaherezankuka n’abigisha bakura hasi
bajana Yezu kwa Pilato.
Batangura rero kumurega bati :

Ab : « Uyu twasanze agomesha intara yacu,
abuza gutanga ikori rya Sezari,
yiyita ubwiwe ngo ni Kristu Umwami. »

S : Pilato aramubaza ati :
Ab : « Uri umwami w’Abayuda ? »
S : Na we aramwishura ati :
Y : « Urabivuze. »

S : Pilato abarira abakuru b’abaherezankuka n’ishengero ati :
Ab : « Nta caha nsanze kuri uyu muntu ».
S : Na bo barushirizaho bati :

Ab : « Aradurumbanya igihugu,
akagenda arigisha Ubuyuda bwose,
kuva i Bugalile aho yatanguriye gushika n’ino. »

S : Pilato ngo avyumve,
abaza ko uwo muntu ari Umunyagalile.
Amenye ko ava mu ntara ya Herodi,
amurungika kwa Herodi,
kuko na we yari i Yeruzalemu muri iyo misi.

Herodi abonye Yezu, aranezerwa cane ;
nka ko, yari yipfuje kera kumubona,
kuko yahora yumva vyinshi kuri we ;
yagira ngo Yezu aza gukora igitangaro mu maso yiwe.
Amubazagiza vyinshi, ariko we ntiyamwishura namba.
Abakuru b’abaherezankuka n’abigisha bari aho
bariko baramurega vyinshi cane.
Herodi n’abanyarugamba biwe baramusuzugura baramutwenga,
bamwambitse igihuzu cera, baraheza bamurungika kwa Pilato.
Uyo musi nyene, Herodi na Pilato bacika pfampfe,
kare na kare bahora bazirana.

Pilato ahamagaza
abakuru b’abaherezankuka, abakurambere n’ishengero,
ababwira ati :

Ab : « Mwanzaniye uyu muntu ngo agomesha igihugu ;
nanje namubajije ngaha imbere yanyu,
nsanga nta caha afise ku vyo mwamurezeko vyose.
Na Herodi nyene nta co yabonye kuko yamudusubije.
Kukaba nka ko, nta co yakoze gikwiye kumwicisha.
Ni uko rero hinge ndamukubitishe, mpeze ndamurekure. »

S : Akaba ku musi mukuru
yategerezwa kubarekurira imbohe imwe.
Ishengero uko ryakabaye riyogorera icarimwe riti :

Ab : « Niwice uyu, uturekurire Baraba. »

S : Uno yari yatwawe mw’ibohero,
azira umugararizo wabaye mu gisagara be n’ubwicanyi.
Pilato yongera kubabwira ijambo, kuko ashaka kurekura Yezu.
Ariko bo barayogora bati :

Ab : « Mubambe ! Mubambe ! »
S : Asubira kubaza ubwa gatatu ati :
Ab : « None ikibi yakoze ni iki ?
Nta caha gikwiye urupfu ndamubonako ;
ndamukubitisha rero, mpeze ndamurekure. »

S : Na bo bashishikara kuyogora, basaba ngo n’abambwe.
Induru ija hejuru.
Pilato aruhira gushinga intahe ngo bibe kuko babisavye.
Arekura uwari yatawe mw’ibohero
azira umugararizo n’ubwicanyi, uwo bari basavye,
Yezu na we amuhebera ugushaka kwabo.

Yezu ku gasozi kitwa Kalvariyo

Bariko baramujana,
bafata umuntu yitwa Simoni Umunyasireni
yari avuye mu mirima ;
bamuremeka umusalaba ngo awikorere akurikire Yezu.
Ishengero ry’abantu ryinshi riramukurikira,
ririmwo n’abagore bagenda barikubita ku gikiriza
bamuririra.

Yezu arakebuka ababwira ati :

Y : « Yemwe bakobwa b’i Yeruzalemu,
ntimundirire !
Nimwirire mwebwe nyene n’abana banyu !
kuko hazoza imisi bazovuga bati :
“Hahiriwe intavyara,
inda zitavyaye n’amabere atonswe !
Ni ho bazobwira imisozi bati :
‘Ni mutugweko !’
Imirambi na yo bati :
‘Ni mudupfuke !’
Nibaba bagiriye gutyo igiti kibisi,
hari akantu icumye, co bizogenda bite ? »

S : Bamutwarana n’abandi babisha babiri,
ngo babice hamwe na we.

Bamaze gushika ahantu hitwa Kalvariyo,
bamubambaho hamwe na ba babisha,
umwe iburyo, uwundi ibubamfu.

Yezu na we aravuga ati :
Y : « Dawe, barekurire kuko batazi ico bakora ! »

S : Mu kugabura ivyambarwa vyiwe na ho, babipfindanirako.
Igihugu cari aho kirorera.
Abakuru na bo baramutwengera mw’ijigo, bati :

Ab : « Yakijije abandi, niyikize rero na we nyene,
niyaba ari Kristu w’lmana, Intore yayo ! »

S : Abasirikare baramutwenga na bo nyene ;
baregera ngo bamuhereze isiki, bamubarira bati :

Ab : « Niwaba uri umwami w’Abayuda,
niwikize wewe nyene ! »
S : Hejuru yiwe kandi, hari urwandiko ngo :
“Uyu ni umwami w’Abayuda.”
Umwe muri nya babisha bari babambanywe na we,
aramutuka ati :

Ab : « Mbega, uri Kristu ?
Niwikize wewe nyene, udukize natwe ! »
S : Ariko, uwundi aramwishura amukankamira, ati :

Ab : « Ntumenya kwubaha Imana,
wewe upfuye rumwe na we !
Tweho tuzize ikiri ukuri, tuzize ico twakoze ;
ariko uyu we, nta kibi namba yakoze. »
S : Araheza abarira Yezu ati :
Ab : « Yezu uranyibuka
aho uzogira mu Bwami bwawe ! »
S : Yezu aramwishura ati :
Y : « Ndakubariye ni ivy’ukuri :
uyu musi, uraba uri kumwe nanje mw’Iparadizo ! »

S : Hari rero nko kw’isaha ya gatandatu ;
maze izuba rirazimangana,
umukorane ukwira isi yose
gushika kw’isaha y’icenda.
Ca gihuzu kimanitse mu gisengero
gitemukira hagati
Yezu na we aratura akamo, avuga ati :
Y : « Dawe,
ndaguhereje umutima wanje. »
S : Avuze atyo, aracikana.

(Aha barapfukama, bakavuga agasabisho gatoyi banumye)

Intwazangabo ibonye ivyo bibaye,
ininahaza Imana iti :

Ab : « Ni ukuri, uyu muntu yari mweranda. »

S : Ishengero ryose ryari ryaje kurorera,
ribonye ibibaye,
risubira inyuma ryikubita ku gikiriza.
Abo bari bazinanye bose
na ba bagore nyene bari bamugendaniye kuva i Bugalile,
bari bahagaze kure babibona.

Igisomwa kigufi giherera aha

Hanyuma haca hashika umuntu yitwa Yozefu,
umushingantahe amenyekana w’inama nkuru,
umuntu w’ingingo n’ubutungane,
we ntiyari yashimye inama n’ingiro yabo,
yari umuntu ava i Arimateya, mu gisagara c’Ubuyuda,
akaba uwiteze Ubwami bw’Imana.
Uyo rero aja kwa Pilato, asaba ikiziga ca Yezu.
Araheza arakimanura, agitekera mu mpuzu yera.
akiryamika mu ruhafu bari bimvye mu kibuye,
ata wari bwaruhambwemwo.
Wari umusi w’ukwitegurira,
isabato yagira ishike.

Ba bagore bari bavanye na Yezu i Bugalile,
baherekeje Yozefu,
barihweza uruhafu n’ingene ikiziga ciwe gihambwa.
Bahindukiye, bategura imbazi zimota neza.
Ku musi w’isabato bararuhuka nk’uko vyategerezwa.


Voulez-vous soumettre un commentaire?

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion /  Changer )

Photo Google+

Vous commentez à l'aide de votre compte Google+. Déconnexion /  Changer )

Image Twitter

Vous commentez à l'aide de votre compte Twitter. Déconnexion /  Changer )

Photo Facebook

Vous commentez à l'aide de votre compte Facebook. Déconnexion /  Changer )

Connexion à %s

Ce site utilise Akismet pour réduire les indésirables. En savoir plus sur la façon dont les données de vos commentaires sont traitées.

Quelques données (Diocèse Ngozi)

Ici, données sur le Diocèse de Ngozi

Eglise Cathédrale de Ngozi

%d blogueurs aiment cette page :